ආගන්තුක කුරුල්ලා - කොහෙන්දෝ ඇවිල්ලාඅපේ කුඩා කූඩුව ළඟ අඟර දඟර ඇයිබලාගෙනයි - අම්මා තාත්තා අපේදැන් ළඟ ළඟ එයිඋඩ කරනම් බිම් කරනම් - මට පේන්න දෝ ඔතරම්රාග තාල ගී කිචි බිචි අහවරයක් නෑඒ උනාට නුඹට මගේ ආදරයක් නෑ..කුරුළු තරුණ පැඟිරි වියේ - ඔය දාංගළේ ඔහොමයිඒ උනාට හොඳ හැදිච්ච කිරිල්ලියක් මංමගේ හිතේ නැතේ නුඹට ආදරයක් නම්..
ගායනය: සුජාතා අත්තනායක
නව තරුණ වියේ පසුවන්නියකගේ හැඟීම් සමුදායක් කිරිල්ලියක වෙසින් ඉදිරිපත් කරන අපූරු ගීයක් ලෙස, ආගන්තුක කුරුල්ලා කොහෙන්දෝ ඇවිල්ලා ගීතය පෙන්වාලිය හැකිය.
ආගන්තුක කුරුල්ලා - කොහෙන්දෝ ඇවිල්ලා
අපේ කුඩා කූඩුව ළඟ අඟර දඟර ඇයි
බලාගෙනයි - අම්මා තාත්තා අපේ
දැන් ළඟ ළඟ එයි
යොවුන් කුමරියන් සිටින ගෙවල් අභියස ඔවුන් කෙරෙහි ප්‍රේමයෙන් බැඳෙනු රිසියෙන් යෞවනයෝ විවිධ දේ කරති. යෞවනියන් කාගේ කවුද යන්න ඔවුන්ට වැදගත් නොවේ. අවැසි එකම දේ ඇයගේ ආදරය යි. එමනිසා ආගන්තුක අය පවා එවැන්නියක සිටින නිවෙස් අභියස ශිල්ප දැක්වීම සුලභ ය. නිරතුරුවම ඇයව දිනාගැනීම වෙනුවෙන් කටයුතු කරයි. යොවුන් කිරිල්ලිය විසින් 'අඟර දඟර ඇයි?' යනුවෙන් ප්‍රශ්න කළ ද, ඒ සියල්ලම තමාව දිනා ගැනීමට බව දනී. ඒ නිසාම දෝ ඇය ඔහුට අවවාද කරන ආකාරයක් දිස්වේ. 'බලාගෙනයි - අම්මා තාත්තා අපේ දැන් ළඟ ළඟ එයි', යනුවෙන් ඇය පවසනුයේ ඇත්තටම ආගන්තුක කුරුල්ලා කෙරෙහි යම් ඇල්මක් ඇති නිසා දෝ යි සිතේ.
කුමරියකගේ ආදරය ඉල්ලුවද එය දුන්නා හෝ නොදුන්නා හෝ ඔහුව පාවා නොදීමට බොහෝ කුමරියන් මානුෂවාදී වේ.ඒ නිසාම දෝ 'ඔය වැඩ පෙන්නුවාට තව ටිකකින් අම්මලා එයි ඊට කලින් යනන' යනුවෙන් අවවාදාත්මක ආකාරයෙන් ප්‍රකාශනයක් ප්‍රකාශිත බව පෙනේ. ඇයට ඕනෑනම් තම දෙමාපියන්ට යොවුන් කුරුල්ලා හෙවත් ඔහුව පාවා දීමට ඕනෑ තරමින් අවස්ථාව තිබුණි. නමුත් ඇය එසේ නොකර ඔහුව දෙමව්පියන්ගෙන් මගහැරවීමට උත්සාහ කළේ, ඇයගේ යටි සිතේ පවා ඔහු පිළිබඳ කුමක් හෝ කාරණාවක් ඇති නිසා නොවේ ද? නිතැතින්ම ඇති නිසා ය. එය ආදරය ද අනුකම්පාව ද යන්න නිසැකවම කිව නොහැකි ය. එය අවිනිශ්චිත ය.
රාග තාල ගී කිචි බිචි අහවරයක් නෑ
ඒ උනාට නුඹට මගේ ආදරයක් නෑ..
මෙය නූතනත්වයට ගළපන විට දී, මෙසේ දැක්විය හැකිය. නව තාරුණ්‍යයේ පසුවන කුමරුවන් බොහෝවිට තමා ආදරය බලාපොරොත්තුවෙන් සිටින කුමරියන් දිනා ගැනීමට බොහෝ දේ කරයි. ගීත ගායනා කිරීම, යතුරු පැදිය හෝ වාහනය විවිධ අයුරින් ධාවනය කරවීම, විවිධ විලාසිතාවන්ට යොමු වීම ආදිය ඊට නිදසුන් ය. ආගන්තුක කුරුල්ලාගේ ඉහත කොටසේ ඇති ක්‍රියාවන් මා ඉහත සඳහන් කළ දේම රචකයා වේගයෙන් පෙන්වීමට ගත් උත්සාහය අගය කළ යුතුම ය. කුරුල්ලා කිරිල්ලිය ඉදිරියේ ශිල්ප දැක්වුව ද, ඇයගෙන් ආදරය ඉල්ලූ වගක් කතුවරයා පවසා නැත. එය දැක්වූයේ, ඔබ ඔය කෙතරම් වැඩ පෙන්නුවත් නුඹට මගේ ආදරයක් නොමතැයි කියා ය. ඇය එසේ කියනුයේ ආදරය නිසාම දෝ යැයි විටෙක මට සිතේ.
කුරුළු තරුණ පැඟිරි වියේ - ඔය දාංගළේ ඔහොමයි
ඒ උනාට හොඳ හැදිච්ච කිරිල්ලියක් මං
මගේ හිතේ නැතේ නුඹට ආදරයක් නම්..
මෙම කිරිල්ලිය තමන්ගේ සම වයස් අයගේ හැඟීම් මැනවින් හැඳින ගත් බුද්ධිමත් අයෙකු වන බව ගීතය අවසානයේ මෙසේ දැක්වේ. ඇය පසුවන්නේත් කෝඩු තරුණ පැඟිරි වියේම ය. නමුදු ඇයට අන් සම වයස් අයට එහා ගිය චින්තනයක් ඇති වග ගී පද රචකයා පසක් කරයි. හැදිච්චකම පිළිබඳව ද රචකයා කියන්නට උත්සාහ කරන ආකාරය ඉතාමත් යථාර්ථවාදී වේ. හැදිච්චකම යනු තරුණ වියේ හැඟීම් ඉවසා දරා එය බාහිරට නොපෙන්වා සිටීම නේද? යන පැනය මේ තුළින් ගම්‍ය නොවන්නේ ද?
ඒ වුවත්, හැදිච්ච යැයි සැළකෙන කෙනා මා හැදිච්ච කෙනෙකු යැයි පැවසීම එතරම් ගැළපේ ද යන්න ගැටලුවකි. ආදරය එකෙණෙහි සෘජුවම නො ඉල්ලූ කෙනෙකුට ආදරය නොදෙනවා යැයි කියන්නේ ආදරය දෙන එකම දෝ යැයි විටෙක සිතේ. මේ ආකාරයට විවිධ අර්ථ රසයන් මවමින් මෙම ගීතය මෙසේ අවසන් වේ.
මෙහි වන සංගීත රසය ද ගීතයේ අර්ථයට උපරිම සාධාරණයක් ඉටුකරන අතර සුජාතා අත්තනායක මහත්මියගේ ගායනය ද අනූපමේය වේ.
ස්තුති...
Nethmi Mahisani ✍
