09. පුර හඳ ලඟින්ම...

පුර හඳ ලඟින්ම 

කඳුළු බිංදුවක් ගෙනත් තියා

තරු එළියටත් හොරෙන් 

කෝ ඔබ කොහිද දුර ගියා...

මාල මල් ලතා මාලතියක ලියා එවා

දෑල සිත් විලේ සසැලි රැලි සරැලි නගා...

ඔබ ආදරේ කියා දුන්නෙත් සඳක් සේ මවා...

ලන්ඳ මත පිපී මාලති පරවෙලා ගියා

පින්න පිණි වැටී පුර හඳ බොඳෙවලා ගියා

ඔබ සෞමය සඳ කියූ ප්‍රේමය කෝ කොහිද ගියා...

ගායනය: මංගලිකා තෙන්නකෝන්
පද රචනය: දේවිකා ජයසුන්දර
සංගීතය: විමල් දයානන්ද

මංගලිකා තෙන්නකෝන් මහත්මිය ගායනා කරනු ලබන, පුර හඳ ලඟින්ම ගීතයෙහි අරුත මා මෙලෙස ඔබ වෙත ගෙන ඒමට සූදානම් වෙමි. එය පෙර ආකාරයක් මෙන් නොවන අතර, පෙරට වඩා ඔබට මෙය දැනේ යැයි මට හැඟේ. ඒ අනුව එහි අරුත මෙසේ ය,  

මා සඳක්, නිකම් සඳක් නොවේ මා පුර සඳක්. මාව පුර සඳක් කළේ ඔබයි. කෙසේ නම් අමතක කරන්න ද ඒ අතීතය. ආදරය මා ඔබෙන් ඉගෙන ගත්තා ද නැතිනම් ඔබ මට ආදරය ඉගැන්නුවා ද කියා හරියටම නොතේරුණත් ඔබේ ආදරය මාව සඳක් කළ බැව් නොකියා ඉන්නේ කෙසේ ද? එනමුත් දැන් ඒ පුර සඳ අභියස කඳුලු බිඳුය. මා පෙරදි සිතුවේ, ඒ ඔබ තබා ගිය කඳුලු කියා ය. එනමුත් පසුව මට පසක් වුණේ, ඒ මමම සෙවූ කඳුළු කියා ය. වෙනදා තරු එළිය අතරින් ඔබව සොයාගැනීම හරිම පහසු ය. නමුත් අද ඒ තරු එළියටත් හොරෙන් ඔබ යන්නට ගිහින්. ළඟ පාතකට නොව. බොහොමයක් දුරට ය. ඔබ මා වෙතින් ඉවතට යන්නට ඔයහැටිම පෙළඹුණේ ඇයි? ද , මට කියන්න.

ඔබම මැවූ සඳ තනි කිරීම එතරම්ම පහසු ද? ඔබත් සමඟ ගත කළ කාලයේ දී, මම ආදරයේ සියුම්ම තැන් පවා දැනගත්තෙමි. ආදරය කියන්නේ මුලු ලෝකයක් බව කියා දුන්නේ ඔබම ය. ඔබේ ඔය ආදර කතා අහන්න මම කෙතරම් නම් ආසද? ඒ බැව් ඔබ නොදන්නවා නොවේ ද? ඔබේ මේ පුර සඳවතිය දුර ආකාසයේ ආඩම්බරව බැබලුනේ හිරු කිරණක් වූ ඔබේ ආලෝකය නිසා නොවේ ද? එයද ඔබට මා නිතරම කියූ දෙයක් නොවේ ද? 

ලන්ද දිගට ලස්සනට පිපී තිබූ මාලතී සියල්ල පරවී ගොස් ය. පිනි බිඳු ද එසේ නොවේ නම් කඳුලු බිඳු දැයි කියා තේරුමක් නැත. කෙසේ වෙතත් ඒ නිසා මේ පුර සඳ බොඳ වී ඇත. ඔබ නොමැති මේ ලොවෙහි කිසිඳු ලස්සනක් නොමැත. ඒ ඔබ තැනූ මිරිඟු ද? නැත්නම්, ඔබ නැති නිසාවෙන් ඒ සියල්ල විනාශ වී ඇත්ද? මේ කිසිවක් මට නොතේරේ. ඔබ මට විඳින්න දුන්න ඒ සෞම්‍ය ආදරය කොහි සැඟවුණි ද? මම තාමත් සොයන්නේ ඒ සඳ ය, ඉදිරියටත් මා ඒ සඳ සොයාවි. යළිත් එය දකින තුරා, අතුරක් නොමැතිවම මා ඒ සඳ සොයාවි. පුරසඳ නැවත තරු එළිය තුළින් දැකීමට මට කෙදිනක හෝ හැකි වේවි. ඒ වන තුරු මම ඒ සඳ සොයාවි.

ස්තුති...

Nethmi Mahisani ✍