06. මගෙ දුවේ ඔබ අවදියෙන් නම්...

මගෙ දුවේ ඔබ අවදියෙන් නම්...

මේ රැයේ මිහිරිම වෙලාවයි

දොර ඇරන් එළියට ආවොතින්...

මේ මිහිරි දේවල් නුබටමයි

 

සේපාලිකා මල් බිමට බැහැලා

ඇවිදින්න යන වෙලාවයි

 

නිල් තාරකා බිම බලාගෙන

වැව් දියට පෙම් බැඳි වෙලාවයි

මේ පොළෙව කෙතරම් සුන්දරද

මගෙ දූත් තනියම හිනාවෙයි

 

ගන කළුවරට අප පෙම් කළොත්

ඉර හඳ තරුවලට ණය ගැතියි

 

ලොව දුන්නු දේවල් අද අපිට

හෙට ලොවට පෙරළා දිය යුතුයි

ඔබ මේ ලොවට ආදරේ නම්

මුලු ලොවම ඔබටත් ආදරෙයි

ගායනය - කරුණාරත්ත දිවුල්ගනේ
ගී පද - රත්න ශ්‍රී විජේසිංහ

සංගීතය - රෝහණ වීරසිංහ 

පියකු විසින් තම දියණිය වෙත කරනු ලබන ආදරණීය ආමන්ත්‍රණයක් ලෙසින් මෙම ගීතයේ අරුත් විකාශිත වේ. පියා තම දියණියට ආමන්ත්‍රණය කරන්නේ, මගෙ දුවේ ලෙසිනි. ඉන් පියා තුළ තම දියණිය කෙරෙහි පවතින්නා වූ අසීමිත සෙනෙහස ධ්වනිත වේ. කලාකරුවා වූ කලී අප සතු නිර්මාණයෙහි ලා උපන් හපන්නු ය යන්න, රත්න ශ්‍රී විජේසිංහයන්ට අතිශයින්ම උචිත ය.

මගෙ දුවේ ඔබ අවදියෙන් නම්...
මේ රැයේ මිහිරිම වෙලාවයි
දොර ඇරන් එළියට ආවොතින්...
මේ මිහිරි දේවල් නුබටමයි

රැයේ සොඳුරුතම මොහොතේ ඇති මිහිරියාව පියා තම දියණියට කියාදෙන්නේ අව්‍යාජ ජන කවියෙකු මෙනි. මේ මොහොතේ සේපාලිකා මල් පවා බිමට බැස ඇත. ඔවුන්ට ඇවිදයන්නට කාගෙන් නම් තහංචිද? නිල් තාරකා බිම බලාගෙන වැව් දියට පෙම් බැඳි වෙලාව යි මේ, යන්න වූ කලී අපූර්ව කව්‍යොක්තියකි. තාරකාවන්හි සේයාව වැව් දියට වැටී ඇත. ඒ දෙස බලන්නකුට පෙනෙන්නේ වැව් පතුලේ තාරකා ඇති බවකි. කවියා මෙය හඳුන්වන්නේ නිල් තරු කැට වැව් දියට පෙම් බැඳීමක් ලෙසයි. මෙය කෙතරම් රමණීය කාව්‍යයක් නොවන්නෙහි ද? එනයින් බැලූ කළ මෙම විශ්වය වූ කලී මනුෂ්‍යයා ලද සොඳුරතම දායාදයක් බවට කතා නැත.

සේපාලිකා මල් බිමට බැහැලා
ඇවිදින්න යන වෙලාවයි
 
නිල් තාරකා බිම බලාගෙන
වැව් දියට පෙම් බැඳි වෙලාවයි
මේ පොළෙව කෙතරම් සුන්දරද
මගෙ දූත් තනියම හිනාවෙයි 

යමෙකු ගණ කළුවරට පෙම් බඳියි නම් ඔහු ඉර හඳට ණයගැති විය යුතුයැයි පියා තම දියණියට පවසයි. එයින් ඔහු තම දියණියට කියන්නේ, ඉර හඳටත් මනුෂ්‍යය අපි කෘතඥ්ඥ විය යුතු බැව් නොවේද? අවසාන පැදිපේළි දෙකෙන් පියා තම දියණියට පමණක් නොව සමස්ථ දරු දැරියන්ටම වටිනා වූ ඔවදනක් ලබාදෙයි. එනම් ඔබ ලොවට ආදරේ නම් මුලු ලොවම ඔබටත් ආදරේ යන්න යි. සැබවින්ම අප ලෝකයාට පෙම් බැඳිය යුතු නොවේද? ලෝකය විනාශ කිරීමට ගිය කල්හි විනාශ වන්නේ ලෝකය පමණක් නොව. අප ද එහි කොටස්කරුවන් වන්නේ ය. එහෙයින් සොබාදහම රැකගැනීම වනාහි අප විසින් අපවම රැකගැනීමක් නොවේ ද? එස් මහින්ද හිමි, ආනන්ද රාජකරුණා කුඩා දරුවන් යොදාගනිමින් ස්වභාවධර්මයේ අගය කියාදුන්නාක් මෙන් රත්න ශ්‍රී විජේසිංහයන් ද  අපට කියාදෙන්නේ සොබාදහමේ අසිරිය යි.

ගන කළුවරට අප පෙම් කළොත්
ඉර හඳ තරුවලට ණය ගැතියි
 
ලොව දුන්නු දේවල් අද අපිට
හෙට ලොවට පෙරළා දිය යුතුයි
ඔබ මේ ලොවට ආදරේ නම්
මුලු ලොවම ඔබටත් ආදරෙයි

මෙම ගීය හරහා සරල බස් වහක් යොදාගත්ත ද ඉන් සමාජයට දෙනු ලබන පණිවිඩය අති මහත් ය.

ස්තුති...

Nethmi Mahisani ✍